Թուրքերը «տղամարդու բարձրակրունկ կոշիկ» են ուղարկել Սարկոզիին

Թուրքական Haber Türk թերթի փոխանցմամբ՝ Թուրքիայի սևծովյան հատվածում ընկած Բարթըն քաղաքի «Իսկական լրագրողների միության» նախագահ Սուլեյման Քարամանը որոշել է յուրովի արձագանքել Ֆրանսիայի Սենատի կողմից Հայոց ցեղասպանության հերքումը քրեականացնող օրինագծի ընդունմանը.

«Ֆրանսիայի նախագահ Նիկոլա Սարկոզին ունի կարճահասակության բարդույթ, ինչի համար էլ մենք նրա համար պատրաստել ենք հատուկ նվեր»։ 

Ապա Քարամանը տուփի միջից հանել է տղամարդու կոշիկներ, որոնց վրա հարմարեցված է եղել կանացի կոշիկի 7 սանտիմետրանոց կրունկ։ Քարամանը հայտարարել է, որ այդ կոշիկն իրենց արժեցել է 15 լիրա (ավելի քան 8 դոլար), և ևս 15 լիրա իրենք տվել են կոշիկի վրա այդ կրունկն ամրացնելուն։

Քարամանը հավելել է, որ այդ կոշիկը «կօգնի» Սարկոզիին առավել բարձրահասակ երևալ, և փոստով ուղարկել է այն Փարիզ։