Ֆուտբոլային պատմության եւ վիճակագրության միջազգային ֆեդերացիան (IFFHS) 1987-2011 թվականների լավագույն մրցավար է ճանաչել իտալացի Պյերլուիջի Կոլինային:

Նրա սպասարկած 1999թ. Չեմպիոնների լիգայի եզրափակիչում «Մանչեսթեր Յունայթեդը» վերջին րոպեներին կորզեց հաղթանակը «Բավարիայից», իսկ 2002թ. աշխարհի առաջնության եզրափակիչում Բրազիլիան 5-րդ անգամ հռչակվեց աշխարհի չեմպիոն:

IFFHS-ի վարկանիշային աղյուսակում Կոլինան հավաքել է 191 միավոր: Երկրորդ տեղը գրավել է նույնպես կարիերան ավարտած գերմանացի Մարկուս Մերկը` 184 միավոր: Երրորդ տեղում դանիացի Քիմ Միլթոն Նիլսենն է, որին հիշում են 1998թ. աշխարհի առաջնության Անգլիա - Արգենտինա խաղում Դեւիդ Բեքհեմին հեռացնելու շնորհիվ: